ബംഗളുരു : മൈസൂരുവിൽ നഗര യാത്രക്കാരുടെ എണ്ണത്തിൽ മൂന്നിരട്ടി വർധനയുണ്ടായതിനെത്തുടർന്ന് പുതിയ നാല് ഡിപ്പോകൾ ഒരുക്കുമെന്ന് കർണാടക ആർടിസി അധികൃതർ അറിയിച്ചു. കൂടുതൽ സിറ്റി ബസ് സർവീസുകളും ഇത് കൈാര്യം ചെയ്യാനുമായാണ് പുതിയ ഡിപ്പോകൾ ഒരുക്കുക.
ടൂറിസം സീസണിലും ദസറയിലും ഇതര സംസ്ഥാനത്തുനിന്നടക്കം മുൻ വർഷത്തേക്കാൾ ഇരട്ടി യാത്രക്കാരാണ് സിറ്റി സർവീസുകളെ ആശ്രയിക്കുന്നത്. നിലവിലുള്ള സർവീസുകൾ ഇത്രയും യാത്രക്കാരെ കൈകാര്യം ചെയ്യാൻ പര്യാപ്തമല്ല. അതിനാലാണ് പുതിയ തീരുമാനം.
കൂടുതൽ ഡിപ്പോകൾ വരുന്നതോടെ യാത്രക്കാരുടെ തിരക്കും മലിനീകരണവും കുറയ്ക്കാൻ സഹായിക്കും. ജനസംഖ്യാ വളർച്ചയ്ക്ക് അനുസൃതമായി സർവീസ് കൂട്ടേണ്ടത് അനിവാര്യമാണ്. ബെംഗളൂരുവിലെ ബിഎംടിസിക്ക് 2011-ൽ 32 ഡിപ്പോകളാണുണ്ടായിരുന്നത്. ഇപ്പോൾ ഏകദേശം 50 ഡിപ്പോകളുണ്ട്. ഈ മാതൃകയാണ് മൈസൂരു പിന്തുടരുക.
യെൽവാൾ, ബന്നൂർ റോഡ്, എച്ച്ഡി കോട്ടെ റോഡ്, ബൊഗാദി എന്നിവിടങ്ങളിൽ പുതിയ ഡിപ്പോകൾ നിർമിക്കാനുള്ള പദ്ധതിയാണ് സമർപ്പിക്കുകയെന്നും വീരേഷ് പറഞ്ഞു. ഒരു പൂർണ ഡിപ്പോ നിർമിക്കുന്നതിന് കുറഞ്ഞത് ആറേക്കർ ഭൂമി ആവശ്യമാണ്.
ഒരു സിറ്റി ബസ് ടെർമിനസ് വികസിപ്പിക്കുന്നതിന് രണ്ടേക്കറും അത്യാവശ്യമാണ്. ഇതെല്ലാം കണക്കിലെടുത്താകും അന്തിമ സ്ഥല നിർണയമെന്നും അദ്ദേഹം പറഞ്ഞു.
